Programmet for Opningshelgi i Den norske bokbyen er klart!
Hovudattraksjonen er som vanleg butikkane, som bugnar av nye og nysorterte bøker, og held ope frå kl. 10-18 kvar dag ut sesongen. Me markerer at Bokbyen har ei av dei største samlingane religiøs litteratur i landet. Mykje av programmet under Opningshelgi tek fatt i dette og handlar om religion, salmar, liv og daude, bibelomsetjing, Hans Nielsen Hauge og religiøst liv i det heile. Og laurdagskvelden held Ole Paus konsert i Fjærland kyrkje. Meir om deltakarane kan du lesa her.
Fredag 30. april:
10.00: Bokbutikkane opnar. Bokby-sesongen er i gang! Massevis av nysorterte godbitar i alle utsal.
13.00: Utstillinga «Hjartespråk» opnar på Bok og Bilde. Bilet- og tekstilkunstnaren Merethe Klæboe og diktar Trond Klaape-Aasdal lagar kunst som talar direkte til hjarta. Bok og bilde, gratis.
21.00: Nils Wærstad har show med utgangspunkt i programseriane med Nils og Ronny. Onkel Mikkel, kr 70.
Laurdag 1. mai:
13.30: Inger Elisabeth Hansen: Preikaren, Forkynnaren, Vismannen. Kor mange bøker kan du tolka ut frå same bok, og korleis kan dei ha sin plass i Bibelen? Onkel Mikkel, gratis.
15.00: Inger Vederhus pratar om Dorothe Engelbretsdatter (1634 – 1716), Noregs første kvinnelege forfattar, ein bestseljande vestlending med krasse innspel til norsk bokhistorie. Kaffistova, gratis.
16.00: Karin Moe: Norges mestseljande forfattar ever: Hans Nielsen Hauge.
Glimt av den lite forsøgte og mindre skriftlærde Dreng Hans Nielsen Hauge(1771-1824): Forfattar, salmediktar, trykkerijegar, innbindar, distributør og lesarhovding i Sogn og Fjordane. Louis Masterson kjem ikkje opp mot Hauges produksjon: til ein befolkning i Noreg i 1804 på 900.000 hadde forleggar og borgar og kjøpmann av Bergen by Hauge fått trykt opp skriftene sine i eit samla opplag på 250.000.
21.00: Konsert. Ole Paus framfører salmar og andre oppbyggelege songar. Fjærland kyrkje, kr 200.
Sundag 2. mai:
11.00: Salmegudstenest, Fjærland kyrkje.
Presten Åge Mundal og organisten Knut Mundal inviterer til salmegudstenest med utgangspunkt i Frans av Assisis bøn.
12.00: Jan Inge Sørbø: Arnold Eidslott som modernistisk diktar.
Jan Inge Sørbø skal snakke om korleis religion er eit viktig tema i modernismen, korleis Eidslott har trekk felles med modernistane, og korleis han også bryt med dei.Onkel Mikkel, gratis.
13.30: Jo Eggen les frå den nye diktsamlinga Stavkirkedikt.
Stavkyrkjene har aldri vore tema for ei heil diktsamling – fram til no. Med «Stavkirkedikt» har Jo Eggen skrive eitt dikt til kvar av dei rundt tretti stavkyrkjene i Noreg. Dette er dikt der arkitektur-, kultur- og lokalhistorie blir levandegjort gjennom Eggens personlege møte med og meditasjonar i kyrkjerommet.
Dette er subjektive, sansande dikt, der stavkyrkjene ofte blir sett frå overraskande perspektiv, frå bak- eller utsida, eller tett innpå utskjeringane i treverket.Onkel Mikkel, gratis.
14.00: Karin Moe: Frå språket til Ordet.
Utifrå at Bokbyen Fjærland har ei overvekt av kristne bøker, vil Karin Moe presentera Bibelens språksyn. Det blir ei personleg språkvedkjenning frå modernismens fristilte språkteikn til Ordet som lukkeleg utfører det det nemner. KM i kjend positur: spagat.
Atterhald om endringar. Eit godt tips: Ting overnatting no, og planlegg turen til Fjærland.
English 
Norsk 
