Den norske bokbyen - Fjærland

Vinterferie og fjellsport

eivind — Tue, 21 Feb 2012 07:08:30 +0000

På mykje av vestlandet er det vinterferie denne veka (og fjellsportfestival på hi sida av Frudalstunellen), så kontoret i bokbyen blir litt mindre bemanna enn vanleg. Tysdag, onsdag og torsdag 21. til 23. februar er me noko mindre på plass enn vanleg, men frå fredag 24. er me i vanleg kontordrift att. Ring, skriv eller ting bøker av hjartans lyst – det er ikkje lenge mellom kvar gong me sjekkar eposten.

Nytt kart og kjørerute på bokbyen.no

eivind — Thu, 19 Jan 2012 12:07:14 +0000

No har me laga til eit betre kart – med kjørerute! – her på bokbyen.no. Viss du lurer på koss du kjem hit, kan du gå til kartsida vår og sjå. Me har òg ordna lenkjer til bussrutetabellar til og frå Oslo.

For dei som likar å pusle med heimesider, kan me nemna at me har brukt WordPress, eit kart-innstikk som byggjer på Google-kart, og vår eiga omsetjing for å få til kartet. Send oss gjerne ein epost om du òg vil ha eit nynorsk kart, så skal du få .po- og .mo-filer.

Biletserie: Då Dagmar fór iveg med sjølvplukken

eivind — Tue, 17 Jan 2012 08:11:37 +0000

Bokbyen kom som kjent heldig frå det under Dagmar-stormen juledagen 2011, men det minste utsalet vårt fekk merke vinden. Den kjende og kjære Sjølvplukken, bokhylla i Mundal der du har kunna plukke med deg bøker for 10 kroner stykkjet, rauk overende og laut ryddast bort (men me skal sjølvsagt få på plass ein ny Sjølvplukk!). Her er nokre bilete frå oppryddinga.

Me er glade i det vesle utsalet midt i Mundal, og skal sjølvsagt få opp eit nytt eit til sesongen 2012.

Dei 300 fyrste fylgjarane på Facebook

eivind — Sun, 15 Jan 2012 21:46:34 +0000

I dag nådde me 300 fylgjarar på Facebook-sida vår. Det synest me er flotte greier, og takkar dykk alle so langt – og me oppmodar kvar og ein til å fylgja bokbyen både på Facebook og Twitter. Del i veg!

Bokbyen lite råka av Dagmar

eivind — Wed, 28 Dec 2011 08:18:25 +0000

Eit fyrste overblikk etter uvêret Dagmar viser at bokbyen kom nokså heldig frå det. Fleire bygningar i Fjærland er skada, og det er til dels store materielle skader. Me i bokbyen har vore heldige, og sender tankar til dei som har fått skade på bygningar og eigedom.

Som alle andre i Fjærland har me vore utan straum. Difor har eit par tingingar måtta venta litt, men me skal få bøkene avgarde i dag. Me surra fast søpelspanna våre før dei verste vindkasta kom, så me slapp å ha lause gjenstandar på drift i bygdi. Bygningane og utsala våre ser òg ut til å ha greidd seg bra, så me held fram det me gjer best: Ordna, sortera og selja bøker, og laga gode boktilstellingar.

Framleis god jul til alle bokbyvener! Høgtida tek som kjent ikkje slutt før tjuande-Knut jagar jula ut.

Bokbyen open mellom kl 12 og 16 frå 12.-16. desember

eivind — Tue, 13 Dec 2011 13:28:11 +0000

Som ei liti tenest til dei som har att gåvehandel, har bokbyen folk på kontoret fast mellom kl. 12 og 16 denne veka, frå 12. til 16. desember. Dette gjeld både Den norske bokbyen AS på ferjekaien og Straumsvågs antikvariat i Mundal. Om du kjem, skal me lova kunnig hjelp til å finna gåver – og kva er vel betre enn ei bokgåve?

Elles vil bokbyen ha fast kontortid minst mellom kl. 9 og 14 heile vinteren fram til sesongen byrjar att. Då har me ope frå 10-18 kvar dag. Me tek ein juleferie, men held kontoret ope arbeidsdagane vinteren til endes. Ring, skriv eller kom innom!

Kari og Claus får fylkeskulturprisen

eivind — Tue, 29 Nov 2011 15:37:40 +0000

Kari og Claus Kvamme, grunnleggjarar og primus motor i bokbyen, har fått fylkeskulturprisen for Sogn og Fjordane! Bokbyen gratulerer – dette er vel fortent!

Som hovudutvalsleiar Nils Gjerland seier: «Det er eit heilt spesielt prosjekt Kari og Claus Kvamme har dratt i gang med bokbyen i Fjærland. Etter å ha vurdert dei mange gode kandidatane, var dette eit enkelt og godt val til slutt.»

Me andre i bokbyen sluttar oss av fullt hjarta til denne utsegna. Bokbyen er heilt spesiell, og det er Kari og Claus som står bak!

Les meir hjå Firda.

Bokbyen gratulerer

eivind — Fri, 18 Nov 2011 17:05:03 +0000

Me gratulerer John Brekke med stillinga som direktør ved Norsk bremuseum her i Fjærland, og med det same takkar me Nils Paulsen for stor innsats gjennom mange år. John kjem frå stillinga som sjef ved Hotel Mundal, og Nils blir pensjonist frå 1. april 2012. Til lukke med ny jobb, båe to!

Godt over 8000 bøker på bokbyen.no

eivind — Wed, 26 Oct 2011 12:03:36 +0000

Nettbutikken vår veks stadig, og me har runda 8000 titlar med god margin. Me prøver å leggja ut bøker i alle kategoriar, slik at nettbutikken blir eit tverrsnitt av det me har i hyllene. Utvalet vil veksa endå meir utover året.

Gåvehandelen kan du med fordel gjera unna her på nettbutikken vår. Og har me ikkje det du leitar etter på nettet, kan du ringja 57692210 og spørja. Me har alltid meir i hyllene enn på nettbutikken.

Takk til Rune Olstad for flott arbeid med å leggja ut bøker!

Stiftinga Den norske bokbyen får stønad frå Norsk kulturråd

eivind — Mon, 17 Oct 2011 07:18:03 +0000

Stiftinga Den norske bokbyen er paraplyorganisasjonen for alle som sel bøker i Fjærland. Det er Stiftinga som kostar kulturprogrammet på Boknatti og dei andre tilstellingane i bokbyen, og det er dette som gjer at me kan tilby publikum gratis litteratur- og kulturaktivitetar av særs høg kvalitet. Tilstellingane skaper blest om Fjærland, og er difor òg viktige for bokseljarane her.

Stiftinga er finansiert frå fleire kjelder, men største luten kjem frå staten via Norsk kulturråd. Bokbyane i Fjærland og Tvedestrand får stønad på denne måten. I sist statsbudsjett har Stiftinga fått ein auke på kr 10.000, og får dermed kr 343.000 for 2012. Dette sikrar aktivitet i Fjærland, og er ein god måte å skapa tilgang til litteratur og kultur på. Stiftinga driv effektivt, og gjer mykje ut av kvar krone.

Takk til dykk alle for hjelpa!