God stemning på Boknatti 2010

I skrivande stund er bokmarknaden, sjølve hovudpunktet under Boknatti, over for denne gongen. Ein kort rapport skal de få midt på natti: Fint, mildt vêr, fornøgde deltakarar, artistar og kundar, og det viktigaste: Ei god, glad og munter stemning. Me har fått mange meldingar om at folk hygga seg, både med dei litterære tilstellingane og med konserten med Stein Torleif Bjella.

Takk for ein fin kveld til dykk alle. Ein spesiell takk til alle dei som fekk istand Boknatti i år ved enorm arbeidsinnsats, mykje på dugnad: Mons, Frikk, Svenn, Nils, Amy, Sigrid, Lisa, Kari, Claus, Randi, Ingrid, Johannes, Sverre, Kurt Ove, Hanne, Trond, Ulla, Trude, Reidun, Kristina, Anita, Aleksander, Svein Arne, Laura, Birgit, og sikkert nokon eg har gløymt. Takk til korpset for ypperleg speling, til alle forfattarane for interessante innslag, til alle bokseljarane som laga ei fargerik ferjekai med mykje godt lesestoff, og til alle dykk som kom. Neste boknatt er laurdag 25. juni 2011. Kom då, og ta med alt av slekt og vener!

Eivind Ødegård,

dagleg leiar i Den norske bokbyen AS