|
|
17.-19. september er det duka for uskuldige, men likevel avanserte krimgåter i Fjærland. Bryn intellektet ditt mellom kilometervis av bøker i bokbyen: Kven blir myrda, kven er den skuldige, og kva har eigentleg skjedd?
Me kan sjølvsagt ikkje sjå inn i framtida og avsløra kva som vil skje. Det me veit, er at Fjærland vil vera åstad for krimgåter 17.-19. september. Truleg vil nokon av gjestene på hotellet bli myrda. Kanskje finst det spor rundt i bokbyen, og moglegvis vil ein skarp tilskodar kunna løysa gåta. Sannsynleg er det at mordaren vil bli konfrontert og endeleg avslørt av dei fremste norske ekspertane på krim i radio og romanar. Heilt sikre på alt dette kan likevel berre dei vera som kjem til Fjærland 17.-19. september.
Eit ekstra lokkemiddel er bokby-mammuten sundag 19. september, med halv pris på alle vanlege bruktbøker. Velkomne!
I år er det 100 år sidan diktaren Åsmund Sveen vart fødd. Etter to inspirerande år på gymaset på Nordfjordeid, debuterte han som lyrikar på Gyldendal i 1932. Sommaren før debuten arbeidde han i resepsjonen på Hotel Mundal i Fjærland. 20. mars 2010 kan du høyra biograf Svanaug Steinnes og bokbymann Eivind Ødegård formidla songane, dikta og det turbulente livet til Sveen under jubileumsseminaret på Onkel Mikkel, Hotel Mundal i Fjærland.
Debutboka og dei seinare bøkene til Sveen fekk overstrøymande kritikkar. Han var snart sentral i i litterært liv, i Forfatterforeningen og som litteraturkritikar i Dagbladet. Samlinga «Bygdeviser» har vorte trykt oppatt mellom anna i Bokklubben, liksom dei to diktsamlingane som kom ut etter at han var død. I dikta til Sveen møter ein gamal tru, ekstatisk naturkjensle, orientalsk mystikk og ung sensualitet. Ein kan også kalle han språkleg nyskapande, og vestlandsopphaldet har nok påverka skogbygdsguten mykje i så måte.
Sveen komponerte dessutan melodiar til ein del av visene. Då han ikkje kunne notar, måtte han få hjelp til å skrive dei ned av andre. Når Bokbyen i Fjærland no byd inn til eit viseseminar 20. mars 2010, er det mellom anna for at folk skal kunne lære seg visene. Ta med gitar og eventuelt andre instrument, utvid reportoaret og opplev det inspirerande landskapet der kanskje mange av visene vart til. Staden er kafe Onkel Mikkel på Hotel Mundal, laurdag 20. mars kl. 17-20. Høve til å kjøpa mat og drikke. Påmelding til Den norske bokbyen: post@bokbyen.no eller telefon 57692210. Inngangspengar.
Konsertar, føredrag, forfattarar, god mat og drikke, men fyrst og fremst: Folkeliv og bokmylder på ferjekaien i Mundal! Maria Parr har skrive fabelaktige barnebøker, sist om Tonje Glimmerdal. Ho er kjend utover landegrensene, og kjem til Fjærland for å lesa og fortelja om forfattarskapen sin. Billa and the Kid held konsert på ferjekaien, og Jørgen Cappelen frå Cappelens antikvariat tek oppatt suksessen frå fjoråret og held bokauksjon. Alt dette skjer fredag 25. til sundag 27. juni 2010, med marknad, konsert og forfattarar på ferjekaien laurdag 26. som høgdepunktet. Me slepper heile programmet når det er klart – det kjem fleire forfattarar og andre deltakarar enn dei som er lista opp her.
Det kan vera lurt å tinga overnatting i god tid før boknatti. Sjå på fjaerland.org for å finna ulike overnattingsalternativ.
Har du bruktbøker til overs? Kom og sel dei på bokmarknaden laurdag 26. juni! Me tilbyr den beste arenaen for å selja bruktbøker. Boknatti er godt innarbeidd, har alltid gode forfattar- og kulturnamn, og trekkjer bokinteresserte folk frå heile landet. Framgangsmåten for å selja bøker er enkel:
- Kontakt oss for å leiga salsplass på Boknatti. For kr 250 får du salsplass under tak, lys, bord, stol og høve til å selja bøkene dine til langt ut på natt.
- Rydd ut or bokhyllene dine, pakk ned bøkene og kom til Fjærland. Me ligg godt til på Vestlandet, og det er lett å finna fram.
- Still ut bøkene på beste vis i salsteltet ditt, sel bøkene dine, og få ei framifrå litteratur- og kulturoppleving med det same!
Atterhald om endringar. Endeleg program blir offentleggjort seinare.
Opningshelgi 2010, frå 30. april til 2. mai, er ein bokfest i rette forstand. Alle bokbutikkane bugnar av nye bruktbøker, fint sortert og lette å finna. Bokbyen har om lag 4 km bøker, og mellom dei er truleg den største samlinga religiøs litteratur i landet. Me trekkjer fram desse bøkene, og bed inn til konsertar, diskusjonar og føredrag rundt salmar, religiøse folktetonar og religiøse innslag i litteraturen i det heile.
Endeleg program blir lagt ut seinare. Spør oss om du lurer på noko!
 I bokbyen er me godt i gang med det nye året. Det fyrste og viktigaste arbeidet vårt er bøkene våre. Me flytter om, finsorterer, prisar, stiller ut og gjer det lettare å finna bøker i sesongen 2010. Me ser òg fram til eit stort og svært kultur- og litteraturprogram frå opninga i mai til langt ut i september. Som så mange år før kan bokbyen i Fjærland tilby forfattarar og kulturnamn på minst nasjonalt nivå. Skal me skrøyta, kan me trygt seia at dette ikkje er lite, korkje for Fjærland, landsdelen eller litteratur-Noreg i det heile.
Medan me ventar i spenning på sumaraktivitetane, kan det høva å sjå litt bakover. Kva skjedde i Fjærland i 2009? Har me rett når me kyter av gode forfattar- og kulturnamn?
Javisst har me det. 1. til 3. mai 2009 hadde me opningshelg i bokbyen. Det store trekkplasteret var Knut Reiersrud og Jan Erik Vold, som gjennomførte ei storarta country-rap-framføring av Terje Vigen i ei smikk full Fjærland kyrkje laurdagskvelden. Per Egil Hegge, Aftenposten-redaktør gjennom mange år, held eit høgaktuelt føredrag om verdsøkonomien og USA. Ingrid Storholmen presenterte eigne dikt og gjendiktingar frå Juliana Spahr, og prata både med Per Egil Hegge og Jan Erik Vold om ulike emne. Og på fredagskvelden spelte Knut Reiersrud blues!
Neste høgdepunkt var sjølvsagt den årvisse boknatti, 21. juni 2009. I fjor utvida me hendingi til eit tredagars festprogram stappfullt med natur og litteratur. Ragnar Hovland var på plass, denne gongen som tidlegare. Det same var Agnes Ravatn, Einar Økland, Olav Orheim, Erlend O. Nødtvedt, Cathrine Grøndahl og Arild Linneberg, som handsama eit vidt spekter av emne, og på so mange ulike måtar. Popkviss med Hovland, barnedikt med Grøndahl, Økland og Hovland, Linneberg om Bertolt Brecht, Økland om Harald Damsleth, Nødtvedt med poesiutbrot.
Me gløymer ikkje Tora Augestad og Stian Carstensen, som fylte kyrkja med revyvisene til Brecht, før Carstensen tok publikum på ferjekaien med til eit noko haugut musikalsk landskap i Aserbajdsjan og Spyttmyra, før han til slutt enda opp med allsang på hotellet. Heller ikkje gløymer me den botaniske turen med bokby-nestor Claus Kvamme, eller den ekte stølsturen med Fjærland sogelag, eller oppvising i lokalt skrivetalent i leseteltet på ferjekaien ved Sigrid Øien Helgheim. Boknatt-helgi var eit herleg stykkje Sogn og litteratur, for heile familien, heile døgeret. Maken finst ikkje.
Mot slutten av sesongen, 14.-16. august, tromma me saman til eit internasjonalt seminar, som fyrst og fremst inneheld sjeldfengen kost frå Jon Fosse. Saman med Karl Seglem og Håkon Høgemo held han konsert og opplesing i kyrkja laurdag 15. august, noko som i seg sjølv er noko å letta på augebrynet over. Dagen etter stilte Fosse til nærsamtale med Ingrid Storholmen. Dei som var der, kjende seg priviligerte over å ta del. Me hadde eit sterkt internasjonalt program i denne augusthelgi, med særleg vekt på USA under Obama. Ketil Raknes, Ethelbert Miller og Amar Bhidé gav kunnskapsrike føredrag på kvar sine felt. Asger Schnack gjekk inn på fenomenet Bob Dylan, og var med på å avslutta helgi med ei verkeleg internasjonal diktlesing saman med Ingrid Storholmen og Ethelbert Miller.
2009-sesongen var ikkje slutt i august, men eit forferdeleg grisevêr på Bokby-mammuten gjorde nok sitt til at det verka rolegare i Fjærland i september. Adventsmarknaden 1. desember held me alle butikkane opne, elles var me mest ute på Odin resten av fjoråret.
Og no, vinteren mellom 2009- og 2010-sesongen, sit me og gjer klar til eit minst like bra program til i år, samt mange nye bøker, lettare og meir oversikteleg plassert enn nokon gong. Me er himmelen for bokormar og friluftsfolk. Er det nokon grunn til ikkje å ta turen i 2010? Nei, det er det ikkje.
Velkomen ynskjer Eivind Ødegård,
dagleg leiar i Den norske bokbyen AS
The Norwegian Booktown is on the Top ten list of unusual gift shops. You can find out why on Tuesday 1 December, when our giftshop, cafe and all bookshops will be open between 3 and 7 pm. We have a large selection of both new and second-hand books, among those several beautiful works ready to be wrapped up and presented as gifts. Add to that a good choice of gift articles you won’t find anywhere else in the world, and at reasonable prices. Get your gifts for less in the booktown, and surprise friends and relatives with gifts they had never expected.
Special sales Sunday in The Norwegian Booktown, only Sunday 27 September:
All secondhand books below NOK 200, and all food at our restaurant, are sold at half price!
Don’t miss this opportunity! A vast number of books are for sale at silly prices this Sunday – and remember: Only Sunday 27 September, and only in the booktown. No discount for webshop orders.
|
|
Norsk
English
