Bokmottak

Har du bøker du må bli kvitt? Kom til Fjærland og  sel dei på boknatti, eller lever til oss gjennom heile året.

Den norske bokbyen er den største gjenbruksverksemda av sitt slag i landsdelen, og reddar kvart år tonnevis av bøker frå avfallsdeponia. Det gjer me ved å ta imot bøker som elles ville bli kasta. Me sorterer dei i rett kategori og set dei fint ut i hyllene slik at dei er lette å finna. På den måten gjev bokbyen bøkene ein meirverdi: Hjå oss er alt saman sortert skikkeleg, ikkje lagt i haug som på ein loppemarknad. Slik kan bokinteresserte finna titlar som ikkje er så lette å finna elles, som vanlege bokhandlar ikkje har plass til, og som biblioteka ikkje har lenger. Ei bok er ikkje uaktuell berre fordi ho er gamal!

Om du vil gje oss bøker, er dette framgangsmåten:

Slik ser veggen på Odin ut. Hit kan du koma med bøkene dine, om du ikkje har høve til å selja dei på Boknatti.

1. Vurder om du kan koma på boknatti. Kvar midtsumarlaurdag lagar me til ein bokmarknad der du sjølv kan selja det du har av bruktbøker, få litt pengar for turen og få ei flott litteraturoppleving med det same. Les meir om boknatti.
2. Ta kontakt på førehand. Ring 57692210 heile året, eller skriv til oss: Den norske bokbyen, 6848 Fjærland. Epostadressa er post alfakrull bokbyen punktum no.
3. Pakk bøkene, aller helst liggande i banankasser eller liknande. Me tek sjølvsagt imot uansett.
4. Om du har høve: Kom innom oss med bøkene. Om du bur langt unna, er det lurt å høyra med folk du kjenner, kanskje nokon av dei skal denne vegen? I det raude huset på ferjekaia tek me imot bøker heile året.

Bokbyen tek imot alle slag bøker, både fag- og skjønnlitteratur, innbundne eller med mjuk perm. Det einaste me ikkje kan ta imot, er Det beste-bøker eller særs fillute og utslitne eksemplar.