Kva er boknatti?

Har du for mykje bøker i hyllene? Kom til Fjærland og sel dei.

Dette er grunnlaget for boknatti. Ein sumarkveld i ei villvakker sognabygd, full av litteratur. Bokmoro for store og små. Ein stor marknad der du kjem med dine eigne bruktbøker, leiger eit salstelt hjå oss, og sel bøkene dine til den ljose morgon. Kvar laurdag nærast jonsok set me opp ei mengd telt og lagar bokfest. Attåt dette kjem konsertar, opplesingar, forfattarar og godtfolk, mat og drikke.

Spørsmål og svar om å selja bøker på boknatti

  • Passar dette for meg? Eg har ikkje prøvd meg som bokseljar før.
    Viss du har gode bøker du treng å kvitta deg med, er Boknatti eit kjempefint høve, og særs koseleg òg. Publikum som kjem hit er opptekne av kvalitet, og kjøper gjerne gode bøker. Viss du har gamle og slitne bøker, kan du ikkje rekna med å få selt noko særleg – men gode bøker går gjerne unna, spesielt viss du er flink til å stilla dei ut. Det er morosamt, og bør prøvast! Det er lurt å alliera seg med nokon som kan dela på å selja bøker med deg, så kan du få med deg litt av det rikhaldige programmet: opplesingar, intervju, konsert, bokbad og forfattartreff, det aller meste gratis for publikum.
  • Ja, dette høyrest moro ut. Korleis gjer eg det?
    Kontakt oss (tlf. 57692210, epostadresse post alfakrull bokbyen punktum no) og sei at du vil leiga eit salstelt. Møt opp på boknattdatoen (boknatti i 2013 var laurdag 22. juni) og ta med bøkene dine, samt gjerne nokre salsfremjande effektar – det kan vera plakatar, pynt eller anna utstillingshjelp. Det er lurt å laga ein salsplass som folk får lyst til å gå innom. Om du er usikker på prising av bøkene, hjelper me deg gjerne. Ver på plass før kl 15 laurdags ettermiddagen, set opp salsbua di, og sel bøker so lenge du vil. Me plar gje oss eit stykkje etter midnatt.
  • Kor mykje kostar det, og kva får eg?
    For kr 250,- får du ein salsplass på om lag 3x3m, eit langbord på om lag 2m, ein stol, samt lys i teltet.

Kom til Boknatti og ta det som ein liten ferietur. Det går an å kosta på seg overnatting og vera med på andre aktivitetar i same slengen. Og blir du ikkje kvitt alle bøkene i løpet av kvelden, kan me oftast ta imot resten.

Send oss ei melding

Har du spørsmål om bøker, Bokbyen eller Fjærland?