Kva er boknatti?

Har du for mykje bøker i hyllene? Kom til Fjærland og sel dei på boknatti.

Dette er grunnlaget for boknatti. Ein sumarkveld i ei villvakker sognabygd, full av litteratur. Ein stor marknad der du kjem med dine eigne bruktbøker, leiger eit salstelt hjå oss, og sel bøkene dine til den ljose morgon. Kvar laurdag nærast jonsok set me opp ei mengd telt og lagar bokfest. Attåt dette kjem konsertar, opplesingar, forfattarar og godtfolk, mat og drikke. Programmet for 2011 er klart, og inneheld bok-moro for liten og stor.

Kva får du? For kr 250,- får du ein salsplass på om lag 3x3m, eit langbord, stol og lys i teltet. Du tek sjølv med deg dei bøkene du vil ha, og det er eit godt tips å ta med ulike salsfremjande effektar – det kan vera plakatar, pynt eller anna utstillingshjelp. Det er lurt å laga ein salsplass som folk får lyst til å gå innom. Om du er usikker på prising av bøkene, hjelper me deg gjerne – ta kontakt. Ver på plass før kl 15 laurdags ettermiddagen (boknatti i 2012 er laurdag 23. juni), set opp salsbui di, og sel bøker so lenge du vil. Me plar gje oss rundt klokka to på natti.

Bokbyen tek sjølvsagt imot bøker heile året, men kvifor ikkje koma og selja dei sjølv, om du har høve til det? Då får du att noko for bryet, og får ei svært hyggeleg oppleving attpå. Ta det som ein liten ferietur, det går an å kosta på seg overnatting og vera med på andre aktivitetar i same slengen. Og blir du ikkje kvitt alle bøkene under boknatti, tek me gjerne imot resten.