Dei fleste bøkene me sel i bokbyen er brukte. Dersom ikkje anna er sagt, vil boka vera synleg brukt, men i god stand. Me bruker ein del boktekniske uttrykk når me skildrar bøkene. Dette gjer dei fleste bruktbokbutikkar og antikvariat, og det er difor lurt å kjenna litt til faguttrykka.
8vo/4to/folio - Dette er uttrykk for storleiken på boka. 8vo («oktavo») vil seia bøker med vanleg storleik. Dei er mellom 15 og 25 cm høge. Større bøker har eit format på 4to («kvarto»), og er over 25 cm høge. Bøker i folio-format er over 35 cm høge. Små bøker, dvs. salmebøker og andre som er lægre enn 15 cm, blir kalla 12mo («duodesimo») eller berre miniatyr. Alle desse uttrykka har med å gjera korleis eit bokark blir bretta før innbinding.
Tverrbd. eller tverr-8vo/4to/folio er bøker som er prenta på tvers, det vil seia at dei er breiare enn dei er høge.
s. - sidetal
oppl. - opplag, til dømes 1. eller 2. opplag
utg. - utgåve
Orig.bd. - originalband. Dette er den innbindinga bøkene kjem i når dei er nye, det vil stort sett seia bøker som er sydde i ryggen, og har dekklar (permar) av papp, med eller utan ulike overtrekk.
Priv.bd. - privatband. Privatinnbundne bøker har fått ny innbinding anten hjå ein profesjonell bokbindar eller hjå ein som har gjort det på hobbybasis.
Sjirtingbd. - sjirtingband. Innbinding med overtrekk av sjirting, som er eit tett lerretsvove stoff. Ordet kjem av engelsk «shirt», det vil seia skjortestoff.
Omslag - vareomslaget som er på mange innbundne bøker. Dersom boka har vareomslag er dette oppgjeve. Omslag blir av og til kalla varetrekk eller smussomslag.
Hefta eller hft. - boka har mjuke permar av papir.
Bibl.eks. - bibliotekeksemplar. Boka har tilhøyrt eit bibliotek og har som regel eiga innbinding, kortlomme og bibliotekstempel.
Snitt - dekorasjon på toppen, botnen eller fronten av boksidene. Mest kjent er gullsnitt, men snitta kan vera marmorerte, farga eller dekorerte på annan måte.
Halvbd. - halvband, ei bok der ryggen og hjørna er overtrekte med skinn eller sjirting.
Exlibris - eigarmerke inni boka. Dei kan vera prenta frå ferdige motiv, eller meir personleg utforma. Dei beste exlibrisane er rein kunst.
Forsatspapir - det arket som er på innsida av dekklane (permane), både på fram- og baksida. Desse kan vera marmorerte eller utsmykka på annan måte.
Tittelblad - den sida av boka der tittelen og forfattaren står. Nokre bøker har ņg smusstittelblad, der tittelen står med mindre skrift.
Frontispiece - eit trykt bilete, i eldre bøker gjerne koparstikk, på sida før tittelbladet.
Kommentarar utover reint teknisk skildring av innbinding, sidetal, tilstand osb. er skrivne i kursiv.
Har du spørmål om bøker i vevkatalogen, må du gjerne ringa oss (måndag-fredag kl. 9.00-14.00) eller senda ein e-post.