Utsal

Dette kartet viser kvar dei ulike utsala i Bokbyen ligg. Langs ei vegstrekning på om lag 300 m finn du 12 bokutsal i alle storleikar og variantar – frå smått til stort.

Her er eit lagerbygg med meir enn ein kilometer bokhylle, og den minste og ærlegaste bokhandelen i landet: sjølvplukkutsalet, der du legg ein tiar i kassa for kvar bok du vil ha. Dette i seg sjølv er ein attraksjon: Anten du bruker pengar på poker eller pynt, eller plukkar opp ei bok til ein tiar hjå oss, vil du få noko som gjev god tidtrøyte for lite pengar. Elles finn du gamle fjøs, naust og venterom, alt omgjort til særprega bokutsal. Me har billegare bøker utanfor kvart utsal for deg som er på gjennomreise og har dårleg tid, men me tilrår at du bruker minimum ein heil dag for verkeleg å få eit visst innblikk i kva me har av bøker. Bokbyen er staden der du tek deg god tid. Det er ei oppleving du ikkje gløymer.

The map shows the various bookshops in the book town. You find the twelve shops, all different in size, within a distance of 300 m.

Our bookshops come in all shapes and sizes: A storage building containing over one kilometre of book shelves, and the smallest and most honest bookshop «Sjølvplukk», where you put NOK 10 in a box for every book you take. There is an old stable, a boat house and a former waiting room, all changed into bookshops of unique atmosphere. While we do have boxes outside each bookshop with discounted books for for people quickly passing through Fjærland, we highly recommend spending at least a whole day browsing our bookshelves. Only that way you get a reasonable overview over what we have. The experience is soothing and calming, and something definetely not to be missed.

Sære og tøffe utsal i bokbyen

Kvar av bokbutikkane hjå oss har sitt heilt spesielle preg, sine eigne spesialitetar og si eiga stemning. Me har opp mot 4 hyllekilometer bøker samla. Alle bøkene er sortert og lette å finne, når du fyrst veit kva utsal som har kva bokkategoriar. Kvart utsal har billege bøker til å ta med seg i farten, samt meir verdifulle bøker til å nyta, lesa, hegna om og ta vare på.

Odin er antikvariatet for norsk skjønnlitteratur, dikt og kunnskap om litteratur. Her finn du ei stor mengd bøker av norske forfattarar, i tillegg til eit svært godt utval kunnskap om forfattarar og litteratur. Litteraturhistorie, litteraturkunnskap og -teori frå heile verda, forfattarbiografiar, essay og kåseri, brevsamlingar, ordbøker, festskrift og kulturhistorie. I tillegg har me eit eige poesihjørne – Poesiens blå blomst.

Odin var tidlegare kiosk og venterom for ferjetrafikken til og frå Fjærland, frå tida før tunellane og vegane knytte Fjærland saman med sør- og nordfylket. Dette bygget er hovudkontoret vårt, og det er her du finn oss på vinteren.

Tusund og ei natt er den største bokbutikken i Fjærland, og den einaste som vart bygd spesielt for å hysa bøker. I tillegg til eit kjempeutval omsett skjønnlitteratur finn du her romanar og noveller på engelsk, samt biografiar, barnebøker, historie, samfunnsspørsmål og politikk, alle moglege realfag, lingvistikk og språk, jakt og fiske, sport, fritid, tidsskrift, humaniora, reiseskildringar og geografi frå Europa og Amerika, og eit lite utval dyrare fyrsteutgåver og samlebøker. I tillegg har me truleg den største samlinga religiøs litteratur i landet. Det tek tid å gå gjennom dette utsalet!

Sjølvplukk er den minste og ærlegaste bokbutikken i landet. Putt ein tiar i boksen for kvar bok  du tek. Open heile sumaren, heile døgeret. Books-to-go, heiter det på engelsk.

Fjøsen er eit av dei mest ynda fotomotiva i bokbyen. I Hønsehuset står ungdomsbøker og fantasy, medan Grisehuset har reiseskildringar og geografi frå Asia, Afrika, Oseania og Sør-Amerika. I sjølve Fjøsen finn du krigslitteratur, med eit godt utval bøker frå både 1. og 2. verdskrigen og andre krigar.

Dette bygget var tidlegare hotellfjøsen til Hotel Mundal. Jostein Gaarder, mangeårig Fjærland- og bokbyven, hadde sumarjobb som grisepassar her.

Arnold er antikvariatet for soge og samtid. Her finn du eit breitt utval noregssoge, delt inn etter fylke. Du finn politikarbiografiar, historietidsskrift og -oppslagsverk, og ei god mengd lokalhistoriske hefte og bøker. Her er det koseleg å sitja ein sumardag.

Arnold var tidlegare båthus og lager, og var lite brukt i mange år før bokbyen flytte inn. Dette gjeld mange av utsala våre: Bokbyen driv gjenbruk av både bøker og bygningar.

Seriesalget spesialiserer seg, som namnet seier, på teikneseriar og bokseriar. Jan Peter Strong frå Fjærland driv utsalet i skuleferien, og har eiga heimeside for utsalet. Dette er eit eldorado for store og små ungar. Både billegare blad, pocketbøker, innbundne teikneseriebøker og litt dyrare hefte i samlarstand finst i Seriesalget. Eit lite utval filmar og DVDar finst òg.

Straumsvågs antikvariat ligg i andre høgda over daglegvarebutikken, og er eit velassortert antikvariat med både antikvariske brukte og nye bøker innanfor alle kategoriar, og eit spesielt godt utval i eldre og nyare barnebøker. Kjell Arve Straumsvåg driv antikvariatet heile året, med god hjelp frå driftige bokfolk i Fjærland. Antikvariatet har òg ei stor mengd bøker på nettbutikken. Der utsalet held til, var det tidlegare fryselager, dokterkontor og hyblar.

Gamleposten held sjølvsagt til i dei gamle postlokala i Fjærland, og har eit breitt utval skjønnlitteratur, seriar og ymse bøker på engelsk. Der finst òg ei samling lyrikk.

Kaffistova er kafeen i bokbyen. Me serverer nydelege, heimelaga kaker og bakverk frå Fjærland, rettferdig kaffi, eplemost og andre drikkar frå Balestrand, samt andre smårettar, is og drikke. Ope kvar dag so lenge sesongen varar, klokka 10-17:30 i høgsesongen, litt kortare opningstider i lågsesongen. Og her er bøker! Ei bra mengd barnebøker, kokebøker, bøker om diettar og kurar, hobby, strikking, hekling, spel, sjakk, filateli, batikk, vev og anna handarbeid, og ei avdeling parapsykologi og mystikk.

Bok og bilde er eit av dei store utsala  i bokbyen, og deler rom med Fjærland turistinformasjon. Her får du i fyrste rekkje turistinfo, gåver og suvenirar, og i tillegg mengdevis av bøker i mange kategoriar: Bøker på andre språk enn norsk og engelsk, ei stor krimavdeling, oppslagsverk, praktbøker og sokalla coffe-table-bøker, kunst og kunstnarar, kongelege, humor, fjernsyn og media, arkitektur, fotografi, vise- og salmebøker, musikk og musikarar, erotikk og seksualitet, juss og lovsamlingar, medisin, polarlitteratur, bøker om miljø og klima, handverk og teknikk, elektronikk, mekanikk, og til slutt ei stor samling gamle og nye kart av alle slag. I tillegg har me ei bra samling LP-plater, og eigen platespelar for å høyra på dei før du kjøper dei. Har du bøker og LP-ar du vil bli kvitt, tek bokbyen imot båe deler.

Me gløymer heller ikkje utstillingane: Bok og bilde har årvisst utstillingar med ulik kunst. Stikk innom og sjå kva me har, utstillingane vekslar fleire gonger i året og skaper variasjon. I tillegg har me nokre faste utstillingar: Soge og utstyr frå Fjærland privatbank, ei samling av utstyr brukt i helse-, jordmor- og tannhelsetenesta i Fjærland, og sjølvsagt Rutlesamlingi: Ei framifrå samling vakkert utskorne trefigurar av multikunstnaren og fjærlendingen Harald Rutle.

Bok og bilde er utsalet der Fokus bank, postkontoret og bibliotekfilialen held til før. Lokala har fått nytt liv med bokbyen, turistinfoen og gåvebutikken. Her er det rikeleg å finna for alle smakar!