Boknatta 2019

Boknatta 2019

Velkomen til Boknatta laurdag 1.juni! 
Sett av datoen og få med deg mykje kjekt program, torgstemning og opne bokbutikkar ei lys sommarkveld mellom fjell, fjord og bre i Bokbyen, Fjærland- verdas vakraste bokhandel. Velkomen!

NB -Allereie FREDAG 31.mai kl 20.30 køyrer vi i gang på Fjærland fjordstove!
Vinsmaking med litteratur og musikk

Kva har gode bøker, musikk og vin til felles? Kompleksitet, fylde og karakter.
Litteraturformidlarane Trond Strand og Janne Karin Støylen inviterer til litterær vinsmaking saman med pianist Jon Kristian Bye.
NB – Det er påmelding og deltakaravgift (kr 490,-, inkluderer vinsmaking). Kontakt Bokbyen på epost eller telefon.

BOKNATTA – LAURDAG 1.JUNI

KL 15.00 Missale Nidrosiense – føredrag ved prost Kjetil Netland
Stad: Fjærland kyrkje

Nidaros messeboka frå 1519 – Kva fortel den og andre kjelder om korleis gudstenesta vart feira i Noreg i mellomalderen?
I Bokåret 2019 set vi søkjelyset på Missale Nidrosiense, ei messebok frå Nidaros, trykt i 1519. Dette var ei av dei fyrste bøkene trykt i Noreg. Ho er ein del av Noregs dokumentarv og har 500-års jubileum i år.

KL 16.30 Årshefta våre – sjel og samlingskraft. Vandring i antikvariat og bokutsal med historikar og forfattar Johs. B. Thue
Stad: Straumsvågs antikvariat

Ei nyhending på programmet i år vert ei guida litterær vandring og oppdagingstur mellom bokhyllene i Bokbyen. Tema for denne vandringa er lokalhistorie med utgangspunkt i dei lokalhistoriske årshefta i bygdene våre.

KL 17.00 Konrad Kråkebolle og andre fjærefantar (barne/familiekonsert)
Stad: Hotel Mundal

Konrad Kråkebolle og andre fjærefantar er ein barne/familiekonsert med
nyskriven musikk og med nynorske tekstar frå boka med same tittel, forfatta av
Lisbeth Dreyer. Musikken er komponert og blir framført av musikarane Lena Skjerdal (vokal), Knut Lothe (perkusjon) og Erik Håkon Halvorsen (tangentinstrument).

KL 18.00 OPNING av Boknatta v/litteraturformidlar Janne Karin Støylen
Stad: Torget

KL 18.00 BOKMARKNADEN opnar
Stad: Torget
Vil du selje eigne bøker? Sjå informasjon her: Bokmarknad lenke

KL 19.00 Forfattar Lars Svisdal i samtale med litteraturformidlar Janne Karin Støylen
Stad: Hotel Mundal

Lars Svisdal (f. 1985) er oppvaksen i Sunndal på Nordmøre, og bur no i Leikanger. Han kom i fjor med ein sterk debutroman «Seg til inkjes». Romanen har fått svært gode meldingar og er tildelt Tajei Vesaas` debutantpris for 2018.

KL 20.00 Øvingskonsert med Stardalen Mannskor og Olav Stedje
Stad: Hotel Mundal

Stardalen Mannskor har i 2019 innleia eit samarbeid med Olav Stedje og Oddvar Torsheim om eit prosjekt under tittelen ”Vi vandrar saman i Nynorsken skog”. Prosjektet er ein hyllest til Nynorsken, og til gode brukarar og formidlarar av denne språkforma.
Publikum vert invitert til å få innblikk i både repertoar og øvingsform.

KL 21.00 Ein driftig djevel i Bergen. Historia om Mons Litleré
Stad: Hotel Mundal

Føredrag ved Jan Olav Gatland som har skrive biografi om Mons Litleré
Mons Litleré (1867–1895) frå Naustdal i Sunnfjord var ein modig, framsynt og initiativrik gründer. Han var grunnleggaren av profesjonell nynorsk forleggarverksemd og bokproduksjon.

KL 22.00 KONSERT MED OLAV STEDJE
Friluftskonsert frå scene på torget i Mundal
Med den mest kjende røysta i Sogn har Olav Stedje vandra saman med eit trufast publikum i snart fire tiår. Røysta openberte seg alt då han var sju og song på juletrefest i speidaren. I ungdomstida song og spela han gitar i bandet Compact. Barten kom først i 1977, og har vore eit fast kjenneteikn sidan gjennom karrieren.
Olav var plagsamt sjenert på scenen i starten av karrieren, og han er framleis ikkje nokon «sjå på meg»-kar, som samarbeidspartneren Finn Tokvam seier. Men no er scenen ein av dei stadene han likar best å vere, og den gode stemninga smittar over på publikum. Ein konsert med Olav Stedje er ei triveleg stund.

Programmet 1.juni er gratis, men gi gjerne di støtte til programmet på kr.200,- til kontonr.: 3720.07.90643 eller VIPPS #105440. Merk med «gåve». Takk!

Send oss ei melding

Har du spørsmål om bøker, Bokbyen eller Fjærland?