Fjærland: Både bokby, brebygd… og konsertstad

Fjærland: Både bokby, brebygd… og konsertstad

Vamp i bokbyen 14. juli 2011. Foto: Gaute Dvergsdal Bøyum/firda.no

Vamp i bokbyen 14. juli 2011. Foto: Gaute Dvergsdal Bøyum/firda.no

Åshild Mundal, Polkabjørn & Kleine Heine, nrwy, Andrea Rice, visesong eller Plumbo? Du har fritt val i Fjærland i sumar.

Ein av grunnane til å bruka tid i Fjærland, er sjølvsagt bokbyen. Å bruka eit par dagar mellom bokhyllene våre er luksus utan like. Bremuseet og breane i seg sjølve er òg verde å bruka tid på – det er dei som er utgangspunktet for heile turismen i Fjærland, frå dei fyrste turistane kom på slutten av 1800-talet.

Av nyare dato er at Fjærland òg er ein utifrå god konsertstad. På denne vesle plassen, med ikring 280 fastbuande, lagar me årleg konsertar for tusenvis av tilhøyrarar. Me har ei nybygd scene på det store kaiområdet, teknisk utstyr og kunnige lydfolk. På sist boknatt var det Åshild Mundal som held konserten for hundrevis av fornøygde folk, og resten av sumaren vil by på eit variert konsertprogram. Sjå berre:

Fyrstkomande fredag, 6. juli kl 21, held Polkabjørn & Kleine Heine konsert på Hotel Mundal. Dei kjem med ein livleg og variert jodlepolka, der røysta og jodleteknikken til Polkabjørn står i sentrum. Må opplevast! Hotellet har òg tilbod om mat og overnatting i samband med konserten, og å bu på eitt av hotella – Hotel Mundal eller Fjærland fjordstove – er ei oppleving i seg sjølv.

Laurdag 14. juli er det konsert på Fjærland bygdahus, med irske Andrea Rice m/band. Andrea har vore i Fjærland fleire gonger før, og mange hugsar det med glede. Drivande irsk tradisjonsmusikk er aldri feil. Bygdahuset kan bli stappende fullt, både på og utanfor dansegolvet, så møt opp!

Neste konsert i Fjærland er gruppa nrwy som spelar tysdag 17. juli kl 20, på Fjærland fjordstove. Me saksar frå programmet:

«nrwy» debuterte i fjor sumar med EP-en Corrections, og har etter dette spelt ei rekke konsertar i inn og utland. Releasekonserten på Fjord Visjon på Sognefjorden 20. august er nok ein av dei mest minneverdige, medan denne sumaren byr på endå fleire spanande eventyr på til dømes Fresn, Malakoff og Øyanatt. Til hausten reiser dei på eigenfinansiert USA-turné for å spele inn si fyrste plate.

nrwy er sterkt påverka av den amerikanske låtskrivartradisjonen, og leitar ein finn ein eit mangfald av inspirasjonskjelder frå fleire tiår, Wilco kanskje den fremste av dei alle.

nrwy består av Erik Grov og Per Christian Grov kjendt frå tidlegare Generous Days, samt Amund Stokke, Sjur Vidar Lilleås og Lill Katrin Bødal, samtlege med årevis av musikkerfaring bak seg. Corrections er innspelt i Sparkle Sound Studios med produsent Marius Kristiansen, og mastra av Metropolis Studios i London (The Beatles, Led Zeppelin, Coldplay, White Stripes m.m.)

Og 24. juli kjem storkonserten dette året, på det særs veleigna kaiområdet i Fjærland. Bandet Plumbo treng knappast nokon nærare presentasjon, men me kan i alle fall vente oss liv og røre på ferjekaien denne kvelden. Ting gjerne billettar på Billettservice.

Når me veit at Vamp har innvigd scena, og at over 800 fekk rommeleg plass på kaien, kan me vente oss massevis av folk utan at det kjennest trongt her. Og med utsikt til blåe breen og grøne fjorden ligg alt til rette for ein minneverdig kveld i Fjærland, både for artistar og lydarar. Velkomen!

… og er du meir for små konsertar, er det visesong både på Fjordstova og Hotel Mundal rett som det er, oftast ved helg.

Send oss ei melding

Har du spørsmål om bøker, Bokbyen eller Fjærland?