Fredag 22.mai kl.20 – 21.30 vil årets fyrste kulturarrangement frå Bokbyen gjennomførast via streaming. Lenkja vil bli lagt ut på vår facebookside etterkvart. Det er Agnes Ravatn og Randi Fuglehaug, i fylgje med musikar Annlaug Børsheim.

Fredag 22.mai kl.20 – 21.30 vil årets fyrste kulturarrangement frå Bokbyen gjennomførast via streaming. Lenkja vil bli lagt ut på vår facebookside etterkvart. Det er Agnes Ravatn og Randi Fuglehaug, i fylgje med musikar Annlaug Børsheim.

Arrangementet har fått tittelen. «Morskap». Det blir samtale, lesing og musikk.

Agnes Ravatn er kjend for si særeigne, vittige stemme og sitt skarpe blikk for menneskeleg svakheit. Særpreget er gjennomgåande i alle bøkene hennar, både i essayistikken og i prosaen. Ho er ein populær og omtykt forfattar, og har utvida lesarskaren ytterlegare når ho no i siste utgjevinga si utforskar krimsjangeren i «Dei sju dørene». Randi Fuglehaug er journalist og forfattar, og har skrive både barnebøker og sakprosa tidlegare. I si siste utgjeving debuterer også ho som krimforfattar med «Fallesjuke». Annlaug Børsheim er eit førsteval for mange forfattarar når ein ynskjer seg musikalsk fylgje i litteraturformidlinga. Som folkemusikar, komponist og skodespelar gjev ho tekstane større spelerom og tolkingsrom.

Til felles har dei tre at dei brukar si eiga livsfase i det kreative arbeidet: Heimlengt, etablering og småbarnsliv, verkar side om side – og ofte i konflikt – med skaparkraft, integritet og ambisjonar. Dei samtalar og reflekterer over livsval og sjangerval, kunstnarliv og familieliv i dette programmet. «Morskap» vert sendt frå Fartein Valen-heimen i Valevåg i Sveio, i samarbeid med Fartein Valens venner, tre generasjonar Langåker og noverande eigar Fartein Valen-Sendestad.

Arrangementet er i samarbeid med Den norske bokbyen i Fjærland og vert vist på bokbyen sine Facebook-sider. Programmet er støtta av Norsk kulturråd. Den digitale formidlinga er støtta av Fritt ord.

Send oss ei melding

Har du spørsmål om bøker, Bokbyen eller Fjærland?