Kva er boknatti?

Har du for mykje bøker i hyllene? Kom til Fjærland og sel dei.

Dette er grunnlaget for Boknatta. Ein sumarkveld i ei villvakker sognabygd, full av litteratur. Bokmoro for store og små. Ein stor marknad der du kjem med dine eigne bruktbøker, leiger eit salstelt hjå oss, og sel bøkene dine til langt utover kvelden. Ein laurdag på den finaste årstida i byrjinga av juni set me opp ei mengd telt og lagar bokfest. Attåt dette kjem konsertar, opplesingar, forfattarar og godtfolk, mat og drikke.

Spørsmål og svar om å selja bøker på boknatta

  • Passar dette for meg? Eg har ikkje prøvd meg som bokseljar før.
    Viss du har gode bøker du vil prøve å selja er Boknatta eit kjempefint høve, og særs koseleg òg. Det er morosamt, og bør prøvast! Det er lurt å alliera seg med nokon som kan dela på å selja bøker med deg så du kan få med deg noko av programmet og besøke bokbutikkane.
  • Ja, dette høyrest moro ut. Korleis gjer eg det?
    Kontakt oss (tlf. 57692210, epost: post@bokbyen.no) og sei at du vil leiga eit salstelt. Møt opp på Boknatt-datoen (Boknatta i 2019 er laurdag 1. juni) og ta med bøkene dine, samt gjerne nokre salsfremjande effektar – det kan vera plakatar, pynt eller anna utstillingshjelp. Det er lurt å laga ein salsplass som folk får lyst til å gå innom. Om du er usikker på prising av bøkene, hjelper me deg gjerne. Ver på plass før kl 16.00 laurdags ettermiddagen, set opp salsbua di, og sel bøker so lenge du vil. Me plar gje oss i god tid før midnatt.
  • Kor mykje kostar det, og kva får eg?
    For kr 200,- (kr 100,- for medlemmar i vennelaget) får du ein salsplass med eit bord på om lag 2x1m + ein stol under teltak.

Kom til Boknatta og ta det som ein liten ferietur. Det går an å kosta på seg overnatting og vera med på andre aktivitetar i same slengen. Og blir du ikkje kvitt alle bøkene i løpet av kvelden, kan me oftast ta imot resten.

Send oss ei melding

Har du spørsmål om bøker, Bokbyen eller Fjærland?