Onsdag 8. september kl.20: Konsert og opplesing av Olav H. Hauge sine dikt og dagboknotatar i Fjærland kyrkje

Onsdag 8. september kl.20: Konsert og opplesing av Olav H. Hauge sine dikt og dagboknotatar i Fjærland kyrkje

Påmelding til [email protected] Arrangementet er gratis, men vi tek gjerne i mot gåver dersom ein tykkjer programmet er bra. Vippsnr: 635180 eller ein kan gi kontant.

Når skodespelar Hildegun Riise og musikarar inviterer til nære møte med tekstar av diktaren Olav H. Hauge, er det også lov til å felle ei tåre. Mange set stor pris på, og har sterke kjensler knytta til det han har skrive, seier Riise som gler seg til å møte publikum med dette programmet.

Programmet har fått namnet ”Under stjernone” og det er bassist Edvard Askeland som har sett musikk til dikta. Saman med Per Jørgensen (trompet), Eivind Aarset (gitar) og Terje Isungset (slagverk) skal dei spele i alt 10 konsertar i Sør-Norge i september. Rom for ord er glade for å få vere vertskap saman med lokale arrangørar i Jostedalen, i Naustdal, på Jølster og i Fjærland. Framsyninga i Fjærland kyrkje vert arrangert i samarbeid med Den norske bokbyen.

Hildegun Riise og Edvard Askeland presenterte sitt Olav H. Hauge-program første gong på Vossa-jazz i 2005. Året etter var prosjektet på ein 3 vekers turné i Sør-Norge for Rikskonsertane. Det vart ei magisk framsyning som vart svært godt motteke av publikum. Palmesundag i 2019 ville Vossajazz ha programmet attende og det samla seg ei fullsett Vangskyrkje til denne kvelden. Hauge (1908-1994) som heile livet budde i Ulvik, vert rekna som ein av dei største norske lyrikarane. Han skaffa seg tidleg kunnskap om verdspoesi og språk. Dikta hans, som ofte tek utgangspunkt i det nære og i naturen, gjev både innsyn og utsyn. Forfattarskapet er møtt med internasjonal interesse og dikta er omsett til fleire språk.

Turneen er støtta av Norsk kulturfond.

Send oss ei melding

Har du spørsmål om bøker, Bokbyen eller Fjærland?