Kva er bokbyen?

Ein bokby er ein liten tettstad med bruktbokhandel som dominerande særpreg. Den norske bokbyen i Fjærland sel bøker i Noregs vakraste natur.

Open kvar dag 30.april - 8.september (frå 14.aug. stengt onsdagar).

Den norske bokbyen i Fjærland

Bokbyen i Mundal i Fjærland vart grunnlagd i 1995 og offisielt opna i 1996 av dåverande kulturminister, Åse Kleveland. Bokbyen har no om lag 4 hyllekilometer bøker til sals i eit titals utsal av ymse storleikar og opphav: ferjeventerom, fjøs, bank, fryseri og postlokale. At bokbyen baserer seg på gjenbruk også når det gjeld utnytting av ledige lokale, gjer at bokutsala blir svært originale i utforming.

Her er to store butikkar: Den norske bokbyen AS (som har fleire utsal), Straumsvågs Antikvariat, og fleire mindre som spesialiserer seg på ymse litteraturområde.

Den norske bokbyen er open frå mai til september. Både Straumsvågs antikvariat og Den norske bokbyen AS har kontorverksemd heile vinteren, og byggjer då opp til neste sesong. Bokbutikkane i Fjærland sel bøker heile året..

Barnebokbyen

I Bokbyen har me mange bøker som er spanande for born og ungdom, og me ynskjer at dei yngste skal trivast i Bokbyen! Me har to store avdelingar for barne- og ungdomslitteratur, på Straumsvågs antikvariat og Bok og Bilde.
I barneavdelingane er det lese-og teiknekrok, og det er nettilgang. Me har òg eit uteområde for leik.

Det er bortimot 10.000 barnebøker i bokbyen. Det er gamle, nostalgiske barnebøker og seriar, men me har óg eit godt utval av moderne bøker på både nynorsk og bokmål.

Ein annan aktivitet i Barnebokbyen er å gå «Bokbystien». Det er ei spørsmålsløype gjennom bokbutikkane med morosame spørsmål for små og store. Her kan heile familien delta.

På fastsette dagar vil det vera kreative aktivitetar for borna, og på Boknatta er det eige barne-program.

Velkomen til Bokbyen med barna i sommar!

Bokbutikkane i Fjærland

Merk at vi vinteren 2022/2023 fornyar store delar av Bokbyen. Difor vil butikkstrukturen når vi opnar våren 2023 vere annleis enn det som vert presentert her. Vi kjem med ny presentasjon når ting er litt meire på plass.

Langs ei vegstrekning på om lag 300 m finn du 10 bokutsal i alle storleikar og variantar – frå smått til stort.

Her er eit lagerbygg med meir enn ein kilometer bokhylle, og den minste og ærlegaste bokhandelen i landet: sjølvplukkutsalet, der du legg ein tiar i kassa for kvar bok du vil ha. Elles finn du gamle fjøs, naust og venterom, alt omgjort til særprega bokutsal. Me har billegare bøker utanfor kvart utsal for deg som er på gjennomreise og har dårleg tid, men me tilrår at du bruker minimum ein heil dag for verkeleg å få eit visst innblikk i kva me har av bøker. Bokbyen er staden der du tek deg god tid. Det er ei oppleving du ikkje gløymer.

Odin er antikvariatet for norsk skjønnlitteratur, dikt og krig.  Her finn du ei stor mengd bøker av norske forfattarar, essay og kåseri, brevsamlingar, norrønt og kulturhistorie.  I tillegg har me eit eige poesihjørne. Her finst òg eit lite utval dyrare fyrsteutgåver og samlebøker. 

Odin var tidlegare kiosk og venterom for ferjetrafikken til og frå Fjærland, frå tida før tunellane og vegane knytte Fjærland saman med sør- og nordfylket. Dette bygget er hovudkontoret vårt, og det er her du finn oss på vinteren.

Tusund og ei natt er den største bokbutikken i Fjærland, og den einaste som vart bygd spesielt for å hysa bøker. I tillegg til eit kjempeutval omsett skjønnlitteratur finn du her romanar og noveller på engelsk, mengder med krim, samt biografiar, historie, filosofi, samfunnsspørsmål og politikk, og elles alle moglege realfag. I tillegg har me truleg den største samlinga religiøs litteratur i landet. Det tek tid å gå gjennom dette utsalet!

Tusund og to er loftet på 1001 natt og har eit svært godt utval kunnskap om forfattarar og litteratur. Litteraturhistorie, litteraturkunnskap og -teori frå heile verda, forfattarbiografiar, lingvistikk og språk, tidsskrift, humaniora og landbruk.

Sjøkanten er ei bokhylle som står på ferjekaia, nær fjøresteinene og med fantastisk utsikt innover fjorden mot breen. Her finst bøker på alle slags språk.

Sjølvplukk er den minste og ærlegaste bokbutikken i landet. Putt ein tiar i boksen for kvar bok du tek. Open heile sumaren, heile døgeret. Books-to-go, heiter det på engelsk.

Arnold og Dahlehuset er den nye tilhaldsstaden for Straumsvågs antikvariat. Desse to bygga var tidlegare naust, fjøs, vaskekjellar og lager, og var lite brukte i mange år før bokbyen flytte inn. Dette gjeld mange av utsala våre: Bokbyen driv gjenbruk av både bøker og bygningar. Straumsvågs antikvariat er eit velassortert antikvariat med både antikvariske brukte og nye bøker innanfor alle kategoriar, og eit spesielt godt utval i eldre og nyare barnebøker. Kjell Arve Straumsvåg driv antikvariatet heile året. Antikvariatet har òg ei stor mengd bøker på nettbutikken.

Kaffistova er kafeen i bokbyen, nyleg overteke av Bøyum camping. Dette er ein god lunsjkafe på dagtid og pub om kvelden, og serverer nydelege, heimelaga kaker og bakverk frå Fjærland samt andre smårettar, og sjølvsagt is og drikke. Ope kvar dag so lenge sesongen varar, klokka 10-17:30 i høgsesongen, litt kortare opningstider i lågsesongen. Og her er bøker! Ei bra mengd kokebøker, bøker om diettar og kurar, alternativ medisin. livsstil, hobby, strikking, hekling, spel, sjakk, filateli, batikk, vev og anna handarbeid, humor og ei avdeling parapsykologi og mystikk.

Bok og bilde er eit av dei store utsala i bokbyen, og deler rom med Fjærland turistinformasjon. Her får du i fyrste rekkje turistinfo, gåver og suvenirar, og i tillegg mengdevis av bøker i mange kategoriar: Ei stor barnebokavdeling, bøker på andre språk enn norsk og engelsk, oppslagsverk, praktbøker og sokalla coffe-table-bøker, kunst og kunstnarar, kongelege, fjernsyn og media, arkitektur, fotografi, vise- og salmebøker, musikk og musikarar, juss og lovsamlingar, medisin, polarlitteratur, jul, medisin, bedriftshistorie, handverk og teknikk, elektronikk, mekanikk, jakt og fiske, sport og fritid, og til slutt ei stor avdeling for lokalhistorie, delt inn etter fylke. I tillegg har me ei bra samling LP-plater, og eigen platespelar for å høyra på dei før du kjøper dei. Har du bøker og LP-ar du vil bli kvitt, tek bokbyen imot båe deler.

Me gløymer heller ikkje utstillingane: Bok og bilde har årvisst utstillingar med ulik kunst. Stikk innom og sjå kva me har. I tillegg har me nokre faste utstillingar: Ei samling av utstyr brukt i helse-, jordmor- og tannhelsetenesta i Fjærland, og sjølvsagt Rutlesamlingi: Ei framifrå samling vakkert utskorne trefigurar av multikunstnaren og fjærlendingen Harald Rutle.

Bok og bilde er utsalet der Fokus bank, postkontoret og bibliotekfilialen held til før. Lokala har fått nytt liv med bokbyen, turistinfoen og gåvebutikken. Her er det rikeleg å finna for alle smakar!