Kva er bokbyen?

Ein bokby er ein liten tettstad med bruktbokhandel som dominerande særpreg. Den norske bokbyen i Fjærland sel bøker i Noregs vakraste natur.

Open kvar dag 1.mai - 12.september.

Den norske bokbyen i Fjærland

Bokbyen i Mundal i Fjærland vart grunnlagd i 1995 og offisielt opna i 1996 av dåverande kulturminister, Åse Kleveland. Bokbyen har no om lag 4 hyllekilometer bøker til sals i eit titals utsal av ymse storleikar og opphav: ferjeventerom, fjøs, bank, fryseri og postlokale. At bokbyen baserer seg på gjenbruk også når det gjeld utnytting av ledige lokale, gjer at bokutsala blir svært originale i utforming.

Her er to store butikkar: Den norske bokbyen AS (som har fleire utsal), Straumsvågs Antikvariat, og nokre mindre.

Den norske bokbyen er open frå mai til september. Både Straumsvågs antikvariat og Den norske bokbyen AS har kontorverksemd heile vinteren, og byggjer då opp til neste sesong. Bokbutikkane i Fjærland sel bøker heile året.

Barnebokbyen

I Bokbyen har me mange bøker som er spanande for born og ungdom, og me ynskjer at dei yngste skal trivast i Bokbyen! Me har tre avdelingar for barne- og ungdomslitteratur, på Straumsvågs antikvariat , Odin antikvariat og Tusund og ei natt.
I barneavdelingane er det lese-og teiknekrok. Me har òg eit uteområde for leik.

Det er bortimot 10.000 barnebøker i bokbyen. Det er gamle, nostalgiske barnebøker og seriar, men me har óg eit godt utval av moderne bøker på både nynorsk og bokmål.

Ein annan aktivitet i Barnebokbyen er å gå «Bokbystien». Det er ei spørsmålsløype gjennom bokbutikkane med morosame spørsmål for små og store. Her kan heile familien delta.

På fastsette dagar vil det vera kreative aktivitetar for borna, og på Boknatta er det eige barne-program.

Velkomen til Bokbyen med barna i sommar!

Bokbutikkane i Fjærland

Langs ei vegstrekning på om lag 300 m finn du bokutsal i alle storleikar og variantar – frå smått til stort.

Her er eit lagerbygg med meir enn ein kilometer bokhylle, og den minste og ærlegaste bokhandelen i landet: sjølvplukkutsalet, der du legg ein tjuekroning i kassa for kvar bok du vil ha. Elles finn du gamle fjøs, naust og venterom, alt omgjort til særprega bokutsal. Me har billegare bøker utanfor kvart utsal for deg som er på gjennomreise og har dårleg tid, men me tilrår at du bruker minimum ein heil dag for verkeleg å få eit innblikk i kva me har av bøker. Bokbyen er staden der du tek deg god tid. Det er ei oppleving du ikkje gløymer.

Odin er antikvariatet for norsk skjønnlitteratur, dikt og krig.  Her finn du ei stor mengd bøker av norske forfattarar, essay og kåseri, brevsamlingar, norrønt og kulturhistorie.  I tillegg har me eit eige poesihjørne. Her finst òg eit lite utval dyrare fyrsteutgåver og samlebøker. 

Odin var tidlegare kiosk og venterom for ferjetrafikken til og frå Fjærland, frå tida før tunellane og vegane knytte Fjærland saman med sør- og nordfylket. Dette bygget er hovudkontoret vårt, og det er her du finn oss på vinteren.

Tusund og ei natt er den største bokbutikken i Fjærland, og den einaste som vart bygd spesielt for å hysa bøker. I tillegg til eit kjempeutval omsett skjønnlitteratur finn du her romanar og noveller på engelsk, mengder med krim, samt biografiar, historie, filosofi, samfunnsspørsmål og politikk, og elles alle moglege realfag. I tillegg har me truleg den største samlinga religiøs litteratur i landet. Det tek tid å gå gjennom dette utsalet!

Trapp opp er loftet på Tusund og ei natt og har eit svært godt utval innan litteraturhistorie og litteraturkunnskap frå heile verda, forfattarbiografiar, lingvistikk og språkhistorie, tidsskrift, vekeblad, samfunnsfaglege bøker, kvinnehistorie og landbruk.

Sjøkanten er ei bokhylle som står på ferjekaia, nær fjøresteinene og med fantastisk utsikt innover fjorden mot breen. Her kan du finne deg ei bok til ein tiar.

Sjølvplukk er den minste og ærlegaste bokbutikken i landet. Putt ein tiar i boksen for kvar bok du tek. Open heile sumaren, heile døgeret. Books-to-go, heiter det på engelsk.

Straumsvågs antikvariat held til i lokalet til tidlegare Bok & Bilde lokalet der Fokus bank, postkontoret og bibliotekfilialen held til før. Dette er eit velassortert antikvariat med både antikvariske brukte og nye bøker innanfor alle kategoriar, og eit spesielt godt utval i eldre og nyare barnebøker. Kjell Arve Straumsvåg driv antikvariatet heile året. Antikvariatet har òg ei stor mengd bøker på nettbutikken. Her er to faste utstillingar: Ei samling av utstyr brukt i helse-, jordmor- og tannhelsetenesta i Fjærland, og sjølvsagt Rutlesamlingi: Ei framifrå samling vakkert utskorne trefigurar av multikunstnaren og fjærlendingen Harald Rutle.

Arnold er eit tidlegare naust som no rommar vinyl, CD og DVD, samt geografi og reiselittratur. I tillegg til litt anna. Bokutsalet er sjølvbetjent, men ein kan få hjelp ved å vende seg til betjeninga på Odin antikvariat.

Inkåleisn er kafeen i bokbyen. Dette er ein god lunsjkafe på dagtid og av og til pub om kvelden. Også her er bøker!